Aðgerðastjórn

 Vinna aðgerðastjórnar hófst að morgni og var aðgerðastjórn að störfum fram undir miðnætti.  Samráð

var við stjórnendur viðkomandi stofnana og aðra aðila.

Í gær, þann 3. nóvember, kom upp grunur um Covid smit hjá tveimur starfsmönnum leikskólans

Sólborgar í Sandgerði.  Stjórnendur leikskólans sendu í gærkvöldi út póst á alla foreldra með

upplýsingum um þetta og tilkynnt að leikskólinn verði lokaður þar til annað kemur í ljós.  Starfsfólk hvatt

til að halda sig heima.  Snemma í morgun voru stjórnendur í þróttamiðstöðvar í Sandgerði og

Sandgerðisskóla upplýstir um stöðu mála og hvatt til þess að huga að mögulegum aðgerðum.  Einhver

fjöldi starfsfólks og nemenda mættu ekki til skóla og vinnu í morgun vegna málsins.  Viðbragðsáætlun

var virkjuð og unnið eftir leiðbeiningum Almannavarna.

Allir starfsmenn leikskólans Sólborgar fóru í PCR sýnatöku fyrri hluta dags í dag, 4.nóvember.

Eftir samskipti við ýmsa aðila, auk þess að safna saman upplýsingum kom í ljós síðdegis að a.m.k. þrír

starfsmenn Sólborgar höfðu greinst með smit, þar að auki a.m.k. 2 börn sem eru nemendur í

Sandgerðisskóla.  Síðar um kvöldið kom í ljós að nokkur börn á Sólborg greindust með smit.  Smitrakning

hófst um leið og upplýst var um stöðu mála hjá Sólborg. Búast má við upplýsingum frá

smitrakningarteymi á morgun og þá kemur betur í ljós hvert umfang smita og aðgerða vegna þeirra

verður.

Aðgerðastjórn tók ákvarðanir um aðgerðir, sem viðbrögð við þessari stöðu og miðast ekki síst að því að

beita fyrirbyggjandi aðgerðum til þess að draga úr samskiptum og freista þess að koma þannig í veg fyrir

mögulega útbreiðslu smita í samfélaginu.  Stjórnendur viðkomandi stofnana settu af stað sínar aðgerðir

til að bregðast við ákvörðun aðgerðastjórnar.  Eftirfarandi tilkynning var birt á heimasíðu og facebook

síðu sveitarfélagsins um kl. 20:00:

Vegna þeirrar stöðu sem upp er komin í Suðurnesjabæ er varðar staðfest Covid-19 smit, m.a. meðal starfsfólks leikskólans Sólborgar í Sandgerði og hjá nemendum í Sandgerðisskóla hefur aðgerðastjórn Suðurnesjabæjar ákveðið eftirfarandi aðgerðir í samráði við viðkomandi stjórnendur:

Leikskólinn Sólborg verður lokaður um óákveðinn tíma meðan smitrakning stendur yfir og þar til tekist hefur að ná utan um ástandið. Skólahald í Sandgerðisskóla fellur niður á morgun, föstudag 5. nóvember.  Íþróttamiðstöðin í Sandgerði verður lokuð á morgun föstudag,  á laugardag og sunnudag.  Félagsmiðstöðin Skýjaborg verður lokuð þar til annað verður ákveðið. Kennsla fellur niður í Tónlistarskólanum í Sandgerði á morgun föstudag og bókasafn Suðurnesjabæjar í Sandgerði verður lokað fram yfir komandi helgi.

Með framangreindum aðgerðum leitast aðgerðastjórn við að koma í veg fyrir að Covid-19 smit dreifi sér í samfélaginu og eru þetta því fyrirbyggjandi aðgerðir fremur en bein viðbrögð við smitfaraldri. 

Aðgerðastjórn vonast til að sem fæstir íbúar Suðurnesjabæjar verði fyrir barðinu á veirunni þessa dagana, en staðreyndin er sú að veiran er komin inn í samfélagið okkar og því er nauðsynlegt að beita aðgerðum. Framangreint verður endurmetið fyrir upphaf næstu viku og verður upplýsingum um það komið á framfæri. Íbúar eru því hvattir til þess að fylgjast með heimasíðu Suðurnesjabæjar og samfélagsmiðlum.

Allar frekari aðgerðir, svo sem varðandi sóttkví og smitgát eru ákveðnar af smitrakningu og Almannavörnum og koma upplýsingar um slíkt beint frá þeim aðilum.

Af fenginni reynslu og af gefnu tilefni eru allir hvattir til að viðhafa persónulegar smitvarnir sem við þekkjum öll vel og fara eftir leiðbeiningum sóttvarnalæknis og landlæknis.

Aðgerðastjórn vonast til að starfsemi stofnana Suðurnesjabæjar sem og daglegt líf í samfélaginu komist í eðlilegt horf sem allra fyrst.

Aðgerðastjórn þakkaði stjórnendum Sólborgar fyrir skjót og hárrétt viðbrögð þegar málið kom upp í

gærkvöldi.