Börn og fjölskyldur
Uppeldisleg ráðgjöf
Samkvæmt lögum um félagþjónustu sveitarfélaga nr. 40/1991 er sveitarfélögum skylt að veita félagslega ráðgjöf, í henni felst m.a. uppeldisleg ráðgjöf. Foreldrum í sveitarfélögum stendur til boða að leita uppeldislegrar ráðgjafar hjá verkefnastjóra fjölskylduverndar, sem og öðrum starfsmönnum félagþjónustu og barnaverndar. Markmið með uppeldislegri ráðgjöf er að auka færni foreldra í uppeldishlutverki sínu og draga úr hegðunarvanda barna.
Foreldrar geta sjálfir sótt um uppeldislega ráðgjöf með því að hafa samband við þjónustuver Suðurnesjabæjar. Grunnskólarnir í Suðurnesjabæ hafa einnig verið milligönguaðilar um tilvísun í uppeldislega ráðgjöf. Foreldrar hafa rétt á 5-10 tímum, sér að kostnaðarlausu.
Heimilisofbeldi
Enginn á að þurfa að búa við ofbeldi frá sínum nánustu.
Mikilvægt er að þeir sem búa við heimilisofbeldi hafi samband við Lögregluna á Suðurnesjum í gegnum Neyðarlínuna með því að hringja í 112. Einnig er hægt að hafa samband við félagsþjónustu Suðurnesjabæjar í síma 425 3000.
Verklagið hjá lögreglunni og félagsþjónustu Suðurnesjabæjar byggist á því að farið er á heimili þegar tilkynning berst til lögreglu um heimilisofbeldi. Á heimilinu er veitt fyrsta hjálp ásamt því að rannsaka málið. Ákveðin eftirfylgni er í málunum sem felst í að starfsmaður félagsþjónustu hefur samband við þolanda innan þriggja daga til að meta þörf á stuðningi og að veita upplýsingar um úrræði. Meintum geranda er einnig boðið að koma í viðtal til að fara yfir hans stöðu. Lögreglan og starfsmaður félagsþjónustu fara svo á heimili þolenda til að fara yfir stöðuna.
Heimilisofbeldi getur haft varanleg áhrif á andlega og líkamlegu heilsu þolandans. Börn eru líka þolendur heimilisofbeldis og þróa oft með sér ákveðin einkenni eins og depurð, lágt sjálfsmat, verkkvíða, skerta félagsfærni, samskiptavanda og margvíslegan tilfinninga- og hegðunarvanda. Það er því mikilvægt að mæta líka þeim börnum sem búa við heimilisofbeldi og veita þeim viðeigandi stuðning svo þau geti unnið úr reynslu sinni.
Stuðningsþjónusta í formi félagslegrar liðveislu
Félagsleg liðveisla er persónulegur stuðningur og aðstoð sem einkum miðar að því að draga úr félagslegri einangrun og styrkja fólk til þátttöku í menningar- og félagslífi. Þjónustan getur verið veitt tímabundið eða til lengri tíma, allt eftir aðstæðum.
Umsókn um stuðningþjónustu fyrir börn
Félagsleg ráðgjöf
Markmið félagslegrar ráðgjafar er tvíþætt; annars vegar að veita upplýsingar og leiðbeiningar um félagsleg réttindamál og hins vegar stuðning vegna félagslegs og persónulegs vanda.
Haft er að leiðarljósi að styðja einstaklinga og fjölskyldur til sjálfshjálpar þannig að hver og einn geti notið sín sem best í samfélaginu.
Félagsleg ráðgjöf tekur meðal annars til ráðgjafar á eftirtöldum sviðum:
- Fjárhagsvanda og fjármála að öðru leyti
- Húsnæðisvanda
- Atvinnuleysis
- Samskipta innan fjölskyldna, meðal annars sambúðarvanda
- Uppeldismála og málefna barna og unglinga
- Hjónaskilnaða og sambúðarslita
- Ættleiðingarmála
- Áfengis- og vímuefnavanda
- Skertrar færni og fötlunar
- Aðstæðna á efri árum
- Vegna umsókna um stofnanavistun
Ávallt er leitast við að veita ráðgjöfina í samhengi við önnur úrræði ef við á og tengja hana þjónustu annarra aðila eftir því sem hentar, svo sem skóla, heilsugæslustöðvar o.fl.
Félagsleg ráðgjöf er meðal lögbundinna verkefna sveitarfélaga. Allir sem orðnir eru 18 ára og eiga lögheimili í Suðurnesjabæ geta leitað ráðgjafar sér að kostnaðarlausu með því að snúa sér til félagsþjónustu sveitarfélagsins.
Flugið
er forvarnarverkefni þar sem unnið er gegn brottfalli ungmenna úr námi og starfi. Flugið er samstarfsverkefni milli Grunnskóla og Fjölskyldusviðs Suðurnesjabæjar. Þátttakendur eru nemendur í 10. bekk grunnskólanna og forráðamenn þeirra, námsráðgjafar og fulltrúi félagsþjónustunnar. Námsráðgjafi grunnskólanna í Suðurnesjabæ sér um að tilvísunarferli í Flugið.
Markmið Flugsins er að efla sjálfsmat og sjálfstraust ungs fólks sem eru í áhættuhópi og vinna með þeim á fyrirbyggjandi hátt. Að efla þrautseigju og einbeitningu ásamt því að tryggja virkni. Fylgst er með gengi nemenda eftir að þeir yfirgefa grunnskóla og veita þeim sem þurfa stuðning og aðstoð til að vera virk í starfi og námi.
Samstarfsstofnanir eru: Fræðsluráð Suðurnesjabæjar, Gerðaskóli, Sandgerðisskóli, Fjölbrautarskóli Suðurnesja, Fjölskyldusvið Suðurnesjabæjar, Heilbrigðisstofnun Suðurnesja, Félagsmiðstöðvar í Suðurnesjabæ ásamt foreldrafélögum í sveitafélaginu.