Umferðaröryggisáætlun
Í umferðaröryggisáætlun sveitarfélaga eru sett fram markmið til næstu fimm ára í umferðaöryggismálum. Þar er farið yfir helstu áskoranir og lagðar til aðgerðir sem miða að því að fækka slysum og koma í veg fyrir að afleiðingar þeirra verði alvarlegar. Slík áætlun stuðlar að markvissari vinnu sveitarfélagsins og veitir stuðning við ákvarðanatöku og forgangsröðun verkefna. Suðurnesjabær hefur tekið ákvörðun um að vinna slíka áætlun og fékk EFLU til ráðgjafar við gerð hennar.
Í Suðurnesjabæ eru tveir þéttbýliskjarnar, Sandgerði og Garður. Samtals búa um 4.000 íbúar í sveitarfélaginu en töluverð umferð liggur um hluta vega sveitarfélagsins, þar sem vegakerfið nær einnig utan um vegi til og frá Keflavíkurflugvelli. Keflavíkurflugvöllur er staðsettur innan sveitarfélagsmarka Suðurnesjabæjar, en Isavia fer með sjálfstætt skipulagsvald á flugvallarsvæðinu. Skipulagssvæði Keflavíkurflugvallar er því ekki tekið með í greiningum þessarar umferðaröryggisáætlunar og engar aðgerðir eru lagðar til innan svæðisins.