Fara í efni

Garðskagi

Garðskagi er einstök náttúruperla þar sem hægt er að njóta einstaks útsýnis og sækja sér orku frá ólgandi brimi. Við Garðskaga má horfa á sólsetrið við Snæfellsjökul og sjá sólina gylla allan Snæfellsnesfjallgarðinn, Akrafjallið, Esjuna og Reykjanesfjallgarðinn.

Vitarnir á Garðskaga

Gamli vitinn á Garðskaga var reistur á Garðskagatá 1897 en áður hafði verið þar leiðarmerki eða varða frá árinu 1847 og síðar með ljóskeri frá 1884. Gamli vitinn var notaður sem fuglaathugunarstöð á vegum Náttúrufræðistofnunar Íslands 1962-1978. Nýi vitinn var byggður 1944 og er hann eitt af helstu kennimerkjum Garðsskagans í dag. Útsýni frá svölum vitans er stórfenglegt og sést þaðan vítt og breitt til allra átta.

Fjaran á Garðskaga er vinsæll útivistarstaður og er einn ævintýraheimur fyrir börnin. Þar er að finna fjölbreytt fuglalíf og oft má sjá flóru farfugla á landinu frá vori og fram á haustið. Þeir sem ekki þekkja fuglana geta kynnt sér þá á veglegum skiltum sem sett hafa verið upp við bílastæði gamla vitans.

Garðssjór er vinsæll til hvalaskoðunar og landselir sitja tíðum uppi á Skagaflös eða Lambarifi. Útselir sjást stundum, oftast á sundi. Höfrungategundin hnýðingur er algengastur en hrefnur sjást reglulega og hnúfubakar eru alltíðir yfir sumartímann, sérstaklega í júlí. 

Getum við bætt efni síðunnar?