Hafnarráð

Fyrir fundinum lá minnisblað þar sem farið er yfir valkosti í tengslum við niðurrif og förgun á Valþóri ÁR-123, yfirgefnum bát sem liggur í Sandgerðishöfn. Til skoðunar er annars vegar að hífa bátinn upp á bryggjuna til niðurrifs og förgunar eða færa hann í Njarðvíkurslipp til niðurrifs. Áætlaður kostnaður við hífingu og niðurrif á bryggju nemur um 4. m.kr. en kostnaður við flutning í slipp til niðurrifs nemur um 12. m.kr.

Afgreiðsla hafnarráðs:
Hafnarráð samþykkir samhljóða að málið verði unnið áfram og að ráðist verði í hífingu og niðurrif á bátnum á Sandgerðishöfn eins og minnisblaðið tilgreinir svo framarlega sem öll tilskilin leyfi liggja fyrir. Var málinu vísað til bæjarstjórnar til ákvörðunar.

Fyrir fundinum lá minnisblað frá Vegagerðinni þar sem farið er yfir tillögur að bættum merkingum við innsiglingarrennu Sandgerðishafnar, en notendur hafnarinnar hafa óskað eftir skýrari afmörkun hennar. Í minnisblaðinu eru tilgreindar tvær tillögur. Tillaga 1 gerir ráð fyrir þremur nýjum föstum grænum staurmerkjum. Hugsunin er að gefa betri vísun inn á 139° innsiglingarleiðina og bæta leiðsögn að beygjunni inn á leiðarlínu III (078,5° ).Tillaga 2 gerir ráð fyrir tveimur nýjum föstum grænum staurmerkjum á stjórnborðshlið 139° innsiglingarrennunnar. Merkin eru staðsett á móti núverandi rauðum staurmerkjum á bakborðshlið rennunnar. Fjarlægð milli merkjapara, mælt þvert yfir rennuna, er um 63,4 m við ytra parið og 56,1 m við innra parið.

Afgreiðsla hafnarráðs
Hafnarráð þakka góða yfirferð og samþykkir samhljóða að unnið verði áfram að málinu í samræmi við þau sjónarmið sem koma fram í tillögu 1. Var bæjarstjóra falið að vinna verkefnið áfram með Vegagerðinni.

Fyrir fundninum lágu nýjustu dýptarmælingar Sandgerðishafnar frá 13. ágúst 2026 en fyrirhugað er að ráðast í dýpkunarframkvæmdir á höfninni til þess að auka afkastagetu hennar.

Afgreiðsla hafnarráðs:
Var bæjarstjóra falið að vinna málið áfram með Vegagerðinni.

Samkvæmt 4. gr. laga hafnasambandsins velja aðildarhafnir fulltrúa á hafnasambandsþing og skal fulltrúafjöldi miðast við árstekjur skv. ársreikningi hafnasjóðs næstliðins árs að undanskildum óreglulegum tekjum. Sandgerðishöfn á tvo fulltrúa með atkvæðisrétt á fundinum og skulu varaþingfulltrúar valdir jafnmargir.

Tillaga um þingfulltrúa:

Lagt er til að með atkvæðisrétt fyrir Sandgerðishöfn fari:

Jón Þór Jónsson Hansen, varaformaður hafnarráðs (S-lista)
Jón Heiðar Hjartarson (D-lista)

Til vara:

Gissur Þór Grétarsson (B-lista)
Guðmundur Torfi Rafnsson (D-lista)

Afgreiðsla hafnarráðs:
Tillagan samþykkt samhljóða af hafnarráði.

Yfirhafnarvörður fór yfir rekstur og starfsemi Sandgerðishafnar undanfarna mánuði.

Afgreiðsla hafnarráðs:
Var málið lagt fram til kynningar.

Umræða um mönnun hafnarinnar og stöðugildafjölda á höfninni. Yfirhafnarvörður hefur óskað eftir því að horfið verði aftur til fyrra skipulags á starfseminni og aukið verði við starfsmannafjölda á höfninni. Bæjarstjóri upplýsti um að unnið væri í rekstrarúttekt á sveitarfélaginu og þar með talið á höfninni.

Afgreiðsla hafnarráðs:
Var málinu vísað til umfjöllunar í bæjarráði í tengslum við vinnslu fjárhagsáætlunar.