Vandamál við fráveitu

Undanfarnar vikur hafa rigningarkaflar sett fráveituna í Sandgerði undir álag sem margir íbúar urðu illilega varir við. Starfsfólk Umhverfismiðstöðvar brást strax við með hreinsunum og neyðardælingum og hefur síðan unnið markvisst að því að létta á kerfinu og koma í veg fyrir frekari tjón. Ástand lykilsvæða hefur verið skoðað á vettvangi, rennslishindranir fjarlægðar með hreinsunum og viðbragð eflt með færanlegum búnaði þegar spár gera ráð fyrir mikilli úrkomu.

Unnið er í nánu samstarfi við verktaka og sérfræðinga að viðgerðum, greiningu og langtímalausnum. Nú liggur fyrir samræmd vinnuáætlun þar sem veikir hlutar kerfisins eru settir í forgang; áhersla er á að ljúka endurbótum sem þegar eru hafnar og bæta rennslisöryggi á álagspunktum. Jafnframt er yfirferð í gangi á rekstri og viðhaldi, rafrænum kortagrunni og myndatöku í lögnum, þannig að ákvarðanir byggist á nýjustu gögnum. Ljóst er að talsvert verk við endurbætur kerfisins liggur fyrir á næstu árum.

Við þökkum íbúum fyrir jákvæð og tillitssöm viðbrögð og biðjum um áframhaldandi góða samvinnu. Smá venjubreytingar skipta máli: hreinlætisvörur og klútar eiga heima í sorp en ekki í klósetti, og fita og olía í ílát áður en þeim er fargað. Í rekstri skiptir reglulegt viðhald á gildrubrunn­um og fitugildrum sköpum. Svona drögum við saman úr stíflum og bakflæði þegar mikið rignir.

Sveitarfélagið heldur áfram reglulegu viðhaldi og forgangsverkefnum á næstu vikum. Ábendingar um lykt, hægt frárennsli, bakflæði eða grun um bilanir í kerfinu má senda á afgreidsla@sudurnesjabaer.is; ef um neyð er að ræða hringið í 112.

Allt sem við setjum í frárennsli hefur áhrif á nærumhverfi okkar. Eftirfarandi hlutir geta stíflað frárennli, pípur og dælur eða mengað umhverfið.