Fjárhagsáætlun Suðurnesjabæjar 2025-2028
Á fundi bæjarstjórnar Suðurnesjabæjar þann 11.desember var fjárhagsáætlun 2025 og þriggja ára áætlun fyrir árin 2026-2028 afgreidd eftir síðari umræðu.
Umfjöllun um forsendur fjárhagsáætlunar hófst á fyrsta ársfjórðungi ársins og hefur bæjarráð fjallað um áætlunargerðina, forsendur og endanlega tillögu um fjárhagsáætlun á undanförnum mánuðum og þá hefur bæjarstjórn átt vinnufundi með starfsfólki sveitarfélagsins til yfirferðar yfir starfsáætlanir og ýmsa liði fjárhagsáætlunar.
Ýmsar forsendur liggja til grundvallar vinnslu fjárhagsáætlunar, svo sem hagspár, áætlanir um útsvarstekjur og framlög frá Jöfnunarsjóði sveitarfélaga. Staða og sýn um þróun atvinnumála og atvinnustigs ásamt spá um þróun íbúafjölda í sveitarfélaginu til næstu missera og ára eru einnig mikilvægar forsendur í áætlanagerðinni. Ýmsir áhrifaþættir eru markaðir nokkurri óvissu og munu hafa áhrif á framvindu áætlana. Þar má m.a. nefna almenna efnahagsþróun, svo sem hvernig mun vaxtastig þróast í náinni framtíð og hvernig tekst til við að vinna bug á verðbólgu.
Á 70. fundi bæjarstjórnar þann 5. júní sl voru samþykkt samhljóða helstu markmið við vinnslu fjárhagsáætlunar. Sveitarfélagið standist fjárhagsleg viðmið um jafnvægisreglu og skuldareglu samkvæmt 64. gr. Sveitarstjórnarlaga. Markmið um að framlegð frá rekstri A og B hluta verði ekki undir 11% á komandi árum. Veltufé frá rekstri verði ekki undir 600 mkr. á ári til að standa undir afborgunum langtímalána og sem mestu af fjárfestingum, sem verði sem mest fjármagnaðar með skatttekjum og söluhagnaði eigna á komandi árum þannig að lántökum verði haldið í lágmarki. Áhersla bæjarstjórnar er á ábyrgð og aðhald í fjármálum, bæði varðandi rekstur og fjárfestingar, en á sama tíma og út frá framangreindum markmiðum verði ekki dregið úr þjónustu við íbúa, heldur verði langtímamarkmið að bjóða íbúum upp á sem sem mesta og besta þjónustu á öllum þeim sviðum sem sveitarfélaginu ber að veita. Loks að gjaldskrá þjónustugjalda haldist í takti við þróun verðlags.
Í forsendum fjárhagsáætlunar ársins 2025 er álagningarhlutfall útsvars óbreytt frá fyrra ári, eða 14,97%, álagningarhlutfall fasteignaskatta verður óbreytt frá fyrra ári og almenn þjónustugjaldskrá er uppfærð miðað við verðlagsþróun. Álagningarstuðull vatnsgjalds er lækkaður um 5,8% frá fyrra ári.
Gjaldskrá sorpgjalda og sorphirðu er óbreytt frá fyrra ári, en góður árangur íbúa við flokkun á sorpi skilar sér í það miklum tekjum frá Úrvinnslusjóði að ekki er ástæða til að hækka gjöld á íbúa vegna sorpmála. Fyrir það eiga íbúar Suðurnesjabæjar þakkir skildar. Ýmsir útgjaldaliðir eru uppfærðir út frá verðlagsþróun og áætlun um launakostnað byggir á kjarasamningum.
Í rekstraráætlun A og B hluta eru heildartekjur áætlaðar 7.361 mkr. og framlegð rekstrar fyrir afskriftir og fjármagnsliði er 813 mkr., eða 11,0%. Að teknu tilliti til afskrifta og fjármagnsliða er rekstrarniðurstaða A og B hluta áætluð jákvæð að fjárhæð 222 mkr.
Í sjóðstreymisyfirliti kemur m.a. fram að veltufé frá rekstri er 842 mkr. og handbært fé frá rekstri 791. Fjárfestingaáætlun er alls 920 mkr. og er áætlað að tekin verði ný lán allt að fjárhæð 250 mkr. en afborganir langtímaskulda eru áætlaðar 361 mkr. Áætlað er að handbært fé í árslok 2025 verði 601 mkr.
Helstu fjárfestingar á árinu 2025 eru áframhald á uppbyggingu nýrra íbúðahverfa í báðum byggðakjörnum, með tilheyrandi uppbyggingu innviða. Áætlað er að kostnaður við þau verkefni verði um 265 mkr. Mikil eftirspurn er eftir íbúðalóðum í Suðurnesjabæ og er áætlað að uppbygging íbúðarhúsnæðis haldi áfram á fullum krafti næstu misserin. Gert er ráð fyrir að hafnar verði framkvæmdir við gervigrasvöll og er fjárheimild til þess verkefnis 300 mkr. á árinu 2025. Þessu til viðbótar eru ýmis minni verkefni á framkvæmdaáætlun ársins 2025.
Á árinu 2024 hefur íbúum Suðurnesjabæjar fjölgað um 183, eða 4,5%. Í byrjun desember 2024 eru íbúarnir alls 4.227 samkvæmt bráðabirgðatölum Þjóðskrár. Í forsendum fjárhagsáætlunar er gert ráð fyrir að íbúum fjölgi um 3,0% á ári næstu árin, samkvæmt miðspá í húsnæðisáætlun sveitarfélagsins.
Efnahagsleg staða sveitarfélagsins er góð og er áætlað að skuldaviðmið skv. reglugerð 502/2012 verði 63,6% í árslok 2025 og því vel undir 150% viðmiði skv. fjármálareglu Sveitarstjórnarlaga.
Í þriggja ára áætlun áranna 2026-2028 er gert ráð fyrir að rekstrarafkoma sveitarfélagsins og efnahagsleg staða standist fjármálareglur Sveitarstjórnarlaga á tímabilinu og er það samkvæmt markmiði bæjarstjórnar.
Helstu niðurstöður fjárhagsáætlunar ársins 2025:
- Tekjur samstæðu (A+B hluti) verða 7,4 milljarðar.kr.
- Tekjur bæjarsjóðs (A hluti) verða 7,0 milljarðar.kr.
- Rekstrargjöld samstæðu (A+B hluti) verða 6,6 milljarðar.kr.
- Rekstrargjöld bæjarsjóðs (A hluti) verða 6,4 milljarðar.kr.
- Framlegð samstæðu (A+B hluti) verður 813 m.kr. eða 11,04%
- Framlegð bæjarsjóðs (A hluti) verður 648 m.kr. eða 9,24%
- Afskriftir samstæðu (A+B hluti) verða 310 m.kr.
- Afskriftir bæjarsjóðs (A hluti) verða 251 m.kr.
- Rekstrarniðurstaða samstæðu (A+B hluti) árið 2025 er jákvæð um 222 m.kr.
- Rekstrarniðurstaða bæjarsjóðs (A hluti) árið 2025 er jákvæð um 210 m.kr.
- Skuldir og skuldbindingar samstæðu í lok árs 2025 verða 6,6 milljarðar.kr.
- Skuldir og skuldbindingar bæjarsjóðs í lok árs 2025 verða 5,3 milljarðar.kr.
- Veltufé frá rekstri samstæðu árið 2025 verður 842 m.kr.
- Veltufé frá rekstri bæjarsjóðs árið 2025 verður 706 m.kr.
- Veltufjárhlutfall A og B hluta samstæðu verður 1,3
- Skuldaviðmið samstæðu (skv.reglug. nr.502/2012) (A+B hluti) verður í lok árs 2025 63,6%
- Skuldahlutfall samstæðu (heildarskuldir og skuldbindingar/rekstratekjum) verður 90,3%
- Skuldahlutfall bæjarsjóðs verður í lok árs 75,9%
- Handbært fé samstæðu verður í árslok 2025 601 m.kr.
Gjaldskrá 2025:
Að jafnaði eru liðir í gjaldskrá að hækka um 4% - 5%. Hækkun vegna þjónustu við börn og barnafjölskyldur ásamt þjónustu við einstaklinga í viðkvæmri stöðu hækkar hvað minnst eða um 4%.
Gjaldskrá úrgangshirðu verður haldið óbreyttri frá árinu 2024 og mun því ekki hækka á milli ára. Breytingar eru á gjaldskrá íþróttamiðstöðva sem gerð verða frekari skil á heimasíðu sveitarfélagsins á næstunni.
Útsvarshlutfall er óbreytt ásamt því að álagningarhlutfall fasteignaskatts er einnig óbreytt.
Lækkun verður á álagningarhlutfalli vatnsgjalda niður í 0,13%
Styrkir og afslættir 2025:
Frístundastyrkur fyrir börn og unglinga í Suðurnesjabæ verður áfram fyrir öll börn á aldrinum 0-18 ára og hækkar í 48.000 kr.
Niðurgreiðsla vegna vistunargjalda barna hjá dagforeldrum hækkar í 88.500 kr. á mánuði miðað við 8 tíma vistun.
Niðurgreiðsla vegna vistunargjalda barna 18 mánaða og eldri hjá dagforeldrum hækkar í 132.000 kr. á mánuði miðað við 8 tíma vistun.
Frístundaakstur á milli byggðarkjarna vegna íþróttaiðkunar festur í sessi og verður áfram.