Aukin opnun félagsmiðstöðva í Suðurnesjabæ

Suðurnesjabær eflir félagsmiðstöðvastarf í Eldingu og Skýjaborg með fleiri opnunum og fjölbreyttara klúbbastarfi. Nýjar opnanir eru hafnar á báðum stöðum og í Eldingu er einnig opið í hádeginu tvo daga í viku. Þátttaka er gjaldfrjáls og öllum í viðkomandi aldurshópi opin.

Staður til að tilheyra

Með auknu framboði fjárfestir Suðurnesjabær í uppbyggilegum frítíma barna og ungmenna. Í félagsmiðstöðvunum geta þau hitt vini, kynnst nýju fólki og tekið þátt í verkefnum sem efla samskiptafærni og sjálfstraust. Þar geta þau líka leitað til starfsfólks sem hlustar og styður þau.

Opið hús fyrir 5.–7. bekk

• Skýjaborg er opin á mánudögum kl. 18:00–19:30 og fimmtudögum kl. 14:15–15:45.
• Elding er opin á mánudögum kl. 14:15–15:30 og miðvikudögum kl. 18:00–19:30.

Starf fyrir 8.–10. bekk

• Opið hús er í Eldingu og Skýjaborg á mánudögum, miðvikudögum og föstudögum kl. 20:00–22:00.
• Hádegisopnanir eru í Eldingu á miðvikudögum og föstudögum kl. 11:55–12:35. Þar geta ungmennin hist og slakað á í hádegishléinu.
• Matreiðsluklúbbur í Eldingu hittist á þriðjudögum kl. 14:30–16:00. Þátttakendur elda saman og njóta afrakstursins.
• Klúbbastarf í Skýjaborg fer fram á þriðjudögum kl. 18:00–20:00. Þar skiptast á PlayStation og matreiðsla.
• Listaklúbbur fyrir 7.-10. bekk á föstudögum, í Skýjaborg kl. 12:30- 14:30 og í Eldingu kl. 15:00-17:00. Hefst 20.nóvember og hver hópur mætir í 4 vikur og eru að hámarki 12 sem geta tekið þátt.

Skráning í klúbbastarf fer fram fyrir hvert skipti á Instagram hjá viðkomandi félagsmiðstöð. Tíu pláss eru í boði hverju sinni.

Opið hús fyrir 16 ára og eldri

Í Skýjaborg er opið hús fyrir ungmenni 16 ára og eldri á fimmtudögum kl. 20:00–22:00. Þar geta þau hitt vini og kynnst nýju fólki í afslöppuðu umhverfi.

Með auknum opnunum og klúbbastarfi tekur Suðurnesjabær jákvætt skref í að efla tómstundastarf sveitarfélagsins og styðja við uppbyggilegan frítíma barna og ungmenna. Við viljum skapa fleiri stundir þar sem þau finna að þau eru velkomin, að á þau sé hlustað og að þau hafi eitthvað spennandi til að hlakka til. Unnið er að því að fjölga klúbbum svo fleiri finni starf við sitt hæfi. Nýir klúbbar verða auglýstir þegar dagskráin liggur fyrir.

Nánari upplýsingar veitir Elín Björg Gissurardóttir, forstöðumaður félagsmiðstöðva í Suðurnesjabæ, á elin@sudurnesjabaer.is.