Starfsemi og þjónusta Suðurnesjabæjar 4. maí 2020

Tilslakanir frá samkomubanni taka gildi  4. maí og snúa einkum að fjöldatakmörkunum, auk þess sem þjónustu sem lokað var vegna mikillar nándar einstaklinga verður heimilt að opna á ný. Suðurnesjabær hefur ákveðið eftirfarandi tilslökun á samkomubanni samkvæmt auglýsingu heilbrigðisráðherra dags. 21. apríl 2020 og minnisblaði sóttvarnalæknis til heilbrigðisráðherra dags. 19. apríl 2020. Einnig er stuðst við leiðbeiningar fyrir velferðarþjónustu sveitarfélaga dags. 22. apríl 2020.

Lögð er áhersla á að áfram verði farið eftir almennum leiðbeiningum um sóttvarnir:

  • Handþvottur og sprittun handa, almennt hreinlæti.
  • Halda 2 metra nálægðartakmörk milli einstaklinga.
  • Fjöldi í sama rými ekki meiri 50 manns, en 20 manns í félagsmiðstöðvum aldraðra.

Ráðhúsin

Frá og með mánudeginum 4. maí vinnur starfsfólk ráðhúsanna í Garði og Sandgerði á sínum starfsstöðvum eins og var fyrir samkomubann. Gætt verður að öllum sóttvarnakröfum og m.a. gerðar viðeigandi ráðstafanir í fundarsölum. Afgreiðslur í báðum ráðhúsum verða opnar á venjulegum tímum, en ráðstafanir gerðar til að uppfylla sóttvarnir, m.a. með takmörkunum á aðgengi gesta inn í vinnurýmin.

Skólastarf

Takmarkanir á skólahaldi falla úr gildi og verður starfsemi leik-, grunn- og tónlistarskóla Suðurnesjabæjar með hefðbundnum hætti. Áfram verður farið eftir almennum sóttvarnaráðstöfunum.

  • Engar takmarkanir verði settar á fjölda nemenda í skólunum.
  • Kennarar og annað starfsfólk mega ekki vera fleiri en 50 á sama stað og gætt verði 2 m. reglu.
  • Félagsmiðstöðvar opna.
  • Skemmtanir t.d. vorhátíðir, vorferðir og útskriftir geta farið fram en án fullorðinna gesta utan skóla s.s. foreldra.
  • Frístundaheimili opna.
  • Skólaíþróttir inni (og úti) verða heimilar.
  • Skólasund og notkun búningsaðstöðu verður heimil.
  • Allir nemendur geta mætt samtímis í skólann, farið í útiveru og verið í mötuneyti.
  • Vegna sóttvarna verður áfram takmarkað aðgengi fullorðinna í skólana.

Velferðarþjónusta

Almenna reglan verður að einstaklingar í sama sóttvarnahópi fái þjónustu á sama tíma. Markmið verður áfram að starfsfólk vinni sem mest með sama hópi og fari ekki milli hópa nema bráð nauðsyn krefji.

  • Félagsmiðstöðvar fyrir fullorðna – Miðhús og Auðarstofa opna mánudaginn 4. maí.

Í félagsmiðstöðvum fyrir aldraða verður áfram regla um 20 manna hámarksfjölda í hverju rými sem tilheyra þá sama sóttvarnahópi. Notendahópum verður skipt upp í sóttvarnahópa og miðað er við að einstaklingar í sama hópi séu saman. Í hópþjálfun er nauðsynlegt að halda 2ja metra regluna og hámarksfjöldi í rými miðast við að þessi regla haldi. Hópþjálfun verður áfram miðuð við að einstaklingar í sama sóttvarnahópi séu saman við æfingar. Það getur þurft að taka upp skráningu fyrir fram í viðburði til að tryggja að fjöldi á hverjum tíma fari ekki yfir 20 manns í rými á hverjum tíma og hægt sé að halda grundvallarsmitgát og 2ja metra fjarlægð.

  • Matur í félagsmiðstöð – Miðhús og heimsendur matur

Frá og með mánudeginum 4. maí verður hægt að borða hádegismat í matsalnum í Miðhúsum. Maturinn verður afhentur í einnota umbúðum. Þjónustan verður ekki opin fyrir gesti og gangandi heldur eingöngu þá sem taka þátt í félagsstarfinu á hverjum tíma. Áfram verður boðið upp á heimsendann mat fyrir þá sem eru í þörf fyrir slíka þjónustu og treysta sér ekki út af heimilinu.

  • Skammtímadvöl fyrir fötluð börn – Heiðarholt

Heiðarholt opnar mánudaginn 4. maí. Starfsemin mun taka mið af aðstæðum húsnæðisins, starfsmannahópnum og með einstaklingmiðuðum hætti fyrir þjónustuþega.

  • Akstursþjónusta fyrir fatlað fólk – Ferðaþjónusta Reykjaness

Ferðaþjónusta Reykjaness sinnir aksturþjónustu fyrir Suðurnesjabæ samkvæmt fyllstu sóttvarnaráðstöfunum og á það bæði við um þjónustuaðila og farþega. Farþegar sem mega ekki nýta aksturþjónustuna eru þeir sem eru í sóttkví, í einangrun (einnig meðan beðið er niðurstöðu sýnatöku), hafa verið í einangrun vegna COVID-19 smits og ekki eru liðnir 14 dagar frá útskrift og þeir sem eru með einkenni (kvef, hósta, hita, höfuðverki, beinverki, þreytu, kviðverki, niðurgang o.fl.).

  • Íbúðakjarni fyrir fatlað fólk – Lækjamót

Íbúum verður áfram skipt upp í sóttvarnahópa og miða við að einstaklingar í sama hópi séu saman. Markmiðið er áfram að starfsfólk vinni sem mest með sama hópi og fari ekki á milli hópa í meira mæli en bráð nauðsyn krefur. Hver íbúi þarf að aðlaga fjölda heimsókna að sínum aðstæðum í ljósi þess að smit getur borist inn á heimili með gestum.

Íþróttamiðstöðvar

Sundlaugar og líkamsræktarstöðvar verða áfram lokaðar almenningi. Samkvæmt tilmælum um stærðarviðmið íþróttasala geta mest fjórir einstaklingar verið þar samtímis ásamt þjálfara og miðast það við skipulagðar íþróttaæfingar. Notkun búningsklefa verður óheimil. Skipulagðar sundæfingar fyrir fullorðna miðast við að hámarki sjö einstaklinga samtímis og mega nota búnings- og sturtuaðstöðu.  Sundlaugar, búnings-og sturtuaðstaða verður opin fyrir sundæfingar barna og unglinga á grunnskólaaldri.

Söfn

Almenningsbókasafn í Sandgerði og byggðasafnið á Garðskaga opna frá og með mánudeginum 4. maí.

Ef smit vegna COVID-19 aukast aftur í samfélaginu getur þurft að endurskoða þjónustuna á ný og verður þá fylgt leiðbeiningum og tilmælum almannavarna, Embættis landlæknis og sóttvarnalæknis.

Við erum öll almannavarnir!