Katla María Íþróttamaður Suðurnesjabæjar

Katla María Íþróttamaður Suðurnesjabæjar

Katla María Þórðardóttir var valinn Íþróttamaður Suðurnesjabæjar en viðurkenningin var veitt í fyrsta sinn eftir sameiningu Garðs og Sandgerðis í Samkomuhúsinu í Sandgerði. Katla María var lykilmaður í liði Keflavíkur sem vann sér sæti í Pepsi-deild kvenna í knattspyrnu. Katla María lék alla leiki liðsins en hún hefur leikið 59 leiki með Keflavík og skorað í þeim 11 mörk og það þrátt fyrir að varnarmaður. Hún var einnig lykilmaður í U17 landsliðinu og lék alla leiki þess á árinu, 5 talsins og var m.a. fyrirliði í einum þeirra. Þá var Katla valin í U19 landslið Íslands á árinu og lék með því 8 leiki á síðasta ári. Katla María hefur vaxið og þroskast mikið sem leikmaður á árinu 2018. Hún er ósérhlífin, föst á vellinum, mjög klók og teknísk, metnaðargjörn, með frábært hugarfar afreksíþróttakonu, er mikil keppnismannseskja og er frábær fyrirmynd.

 

Þeir sem tilnefndir voru sem Íþróttamenn Suðurnesjabæjar og fengu viðurkenningu fyrir árangur sinn á árinu 2018 eru:

Atli Viktor Björnsson, fimleikar,
Daníel Arnar Ragnarsson, taekwondo
Hafsteinn Þór Friðriksson, golf
Katla María Þórðardóttir, knattspyrna (Keflavík)
Kristján Þór Smárason, körfuknattleikur
Magnús Orri Arnarsson, fimleikar Special olympics.
Rúnar Gissurarson, knattspyrna (Reynir)
Róbert Ólafsson, knattspyrna (Víðir)
Ægir Már Baldvinsson, judo

 

Eva Rut Vilhjálmsdóttir fékk viðurkenningu frá Íþrótta og tómstundaráði fyrir framúrskarandi störf að íþrótta og æskulýðsmálum í sveitarfélaginu. Á árinu 2018 hefur hún unnið slitlaust fyrir Aðalstjórn Víðis ýmist sem meðstjórnandi, ritari og síðustu ár sem gjaldkeri Víðis, kom hún að endurvakningu meistaraflokk kvenna sem tók þátt í bikarkeppni KSÍ í sumar í samstarfi með Þrótt Vogum. Eva Rut hefur staðið sig vel sem gjaldkeri Knattspyrnufélagsins Víðir og viðhaldið góðum rekstri félagsins sem er umtalað í knattspyrnuhreyfingunni og á fundum ÍS. Eva Rut hefur gegnt lykilhlutverki í fjáröflunum félagsins þar má nefna stærsta þorrablót á Suðurnesjum sem haldin er af Bjsv. Ægir Garði og Knattspyrnufélaginu Víðir, skipulagningu og framkvæmd Sólseturshátíðarinnar í Garði, kótilettukvöld, Herra- og konukvöld Víðis ásamt því að vera liðleg að hjálpa til við fjáraflanir yngri flokkana og meistaraflokks Víðis. Eva er unglingaráði Víðis og Reynis innan handar við þrif og að græja búningatöskur fyrir leiki yngriflokkana og í starfinu.

Eva Rut hefur unnið frábært starf fyrir knattspyrnufélagið Víðir í rúm síðast liðin 8 ár og komið að ýmsum málum varðandi barnastarf innan Víðis.